UA TUS TXIV/NIAM HU PLIG TSAUG
Lus sam mas hais li no nawb. Hais rau koj tus ua (txiv, niam, tij)
hnub no vam vam koj tuaj nqee ntsuj nqee hlauv. Luag hais tias, zaum
no koj tuaj ces koj tuaj nqee li laws lawm tej yas KEV, zaum no koj
tuaj ces koj tuaj nqee tau nws me ntsuj duab li ntsuj plig rov los rau
TSEV, rov los puab nws CEV, rov los nrog (niam nrog txiv/tub nws kiv)
nyob ua ib KE lawm. Luag hais tias, zaum no koj tuaj ces koj tuaj
nqee li laws lawm tej yas NCUA, zaum no koj tuaj ce koj tuaj nqee li
laws tau nws me ntsuj plig li ntsuj DUAB, rov los TXHUA, rov los puab
nws DUAB, rov los nrog (niam nrog txiv/tub nrog kiv) nyob ua ib PUAB
lawm.
Yuav kom tsum kev tsum cai, txawm tsis muaj ib tug me ntxuag los deev
koj ncauj los yuav tsum muaj ib khob me zoo dej los tub koj QA thiaj
yuav tsim nyog koj txoj kev PAB. Cuag li twb tsis paub tab yam, ci li
ua li me nyuam yaus tsis paub qab haus muab ib lo lus qhuav qhuav los
khuj koj ib los thov koj ho zam lub txim thiab tsis txhob tu siab.
Nyaj koj ua txiv tuaj pab pab tsev neeg (tuav tsev neeg tus txiv tsev
ntawd npe) zaum no lawm los, peb tsoom kwv tij yuav nco koj tus txiaj
tus ntsig. Xab theeb lwm hnub koj ho tsis muaj chaw txib chaw khaiv
los puaj sim tseg. Yog koj ho muaj chaw txib chaw khaiv, ntshe koj ho
vam tsis txog hu tsis txog peb tej kwv tij txiv tub xwb. Yog koj vam
txog hu txog los peb tus twg txawj yam twg los peb yuav tuaj pab yam
ntawd. Ho tsis txawj dab tsi los lub dag lub zog yuav cia rau koj
ntos no lau mog, (pe).